Локалната власт предводена од ВМРО-ДПМНЕ во периодот од 2005 до 2017 година вложи над 12 милиони евра инвестиции во образованието во Прилеп.

Се инвестираше без исклучок во сите училишта, како во градот, така и во населените места, а како резултат на тие инвестиции, денеска значително се подобрени условите за настава и работа. Подрачното училиште на ОУ “Рампо Левката”, сместено во населбата “Сточен пазар”, беше изградено на барање од жителите на населбите кои гравитираат во овој дел од градот.

Ова училиште требаше да ја доближи наставата поблиску до децата од овие населби и значително да

им го олесни секојдневието на нивните родители.

За жал, денеска во ова училиште, иако објектот е целосно изграден, нема да се слушне детскиот џагор. Причината за тоа, како и за многу други работи, е суетата и барањето алиби на градоначалникот Илија Јованоски.

Наместо денеска да се ставеше крај на проблемите на голем број родители , чии деца патуваат повеќе од 2 километри до најблиското училиште, поради неработењето на локалните власти, тоа ќе продолжи и во оваа школска година.

Заборави ли Јованоски дека во неговата предизборна програма ветуваше нови училишта? Дали градоначалникот и општина Прилеп сакаат да помине време и да се заборави кој го изгради ова училиште, а потоа како што направија со градинката во ОУ “Рампо Левката”, да го претстават и овој проект како свој?

Заборави ли Јованоски дека речиси една година е на власт и дека граѓаните очекуваат резултати и реализирани проекти?

Само доколку се потрудеше да се заврши се’ што се започна, веќе денеска Прилеп ќе беше подобро место за живеење, додека на ваков начин оставаат нов објект на милост и немилост. Ваквата несериозност, незаинтересираност и неработење, прилепчани веќе ја препознаа и токму затоа во прва наредна прилика ќе ја казнат оваа расипничка власт.

Ви благодарам!